Articoli

Va in agonia le stele
sul culo del bicier;
la luna a cavalon
de l’orlo ormai sbecà
la ris-cia de svenarse.

Ricordi, surle mate,
rusa confusi
tra le pieghe de la note,
tra i sogni che deventa
cuerte curte.

E gh’è rimpianti,
a fil del vento,
che va su slissiarole
de busie
morendo in gola
a l’alba.

E el giorno novo el nasse
sensa l’anima.

Su un campo pena arà, un spaventapàssare,
sgonfo de paia, ne la piova e el vento,
de guardia al gran ancora in vià da nàssare,
el se sentiva un poco malcontento…

Apena el gran ‘l meteva su la testa,
a l’improviso gh’era mile osei,
che i ciacolava, che i faseva festa,
sercando de magnar con pochi schei…

La guardia la sigava a più no posso
ma i oseleti gnanca i ghe badava…
i se scondea tra i trimi e drento el fosso
e a l’ora de disnar se comodava…

Ma in fin de i conti el se passava via,
el se godea a zugar a guardie e ladri,
senza paure, gnanca se ‘l sentìa
el brontolar insulso de i mezadri…

Finìa l’istà, rivava i tempi duri,
el gran a spigolar l’era più ciaro…
verta la cacia, sora i campi scuri,
i osei i scapava a s-ciapi al primo sparo…

Un oseleto, sopo, desgrassià,
che no’l podea scapar co la maraia,
quando el sentea l’odor de s-ciopetà
el se scondea par drento de la paia

de la so guardia e lì el spetava, muto,
che tuto se metesse ancora chieto…
Ma un giorno de setembre, griso, bruto,
na fusilà à copà ‘l poro oseleto…

La passareta, come pel de figo,
l’è restà tacà via, con le ale in crosse,
sora la gamba seca del so amigo…
Al bon spaventapàssare la vosse

la s’à smorsado in gola in un lamento…
El pal che lo tegnéa levà da tera
‘l s’à scavessà: e sul campo de fromento
gh’è cascà l’ombra longa de la sera…

Case e quarei
de storie smemorià…
su i sassi l’aqua
l’è passà
come un struzon
e l’à lassà el segnal
de lune perse.

Su i copi l’ala
de la grola
disegna cerchi streti.

Le strade i è più longhe
e le finestre orbade
no le gà fiori o vasi
a intiepidir el vento.

Su le careghe e su la tola,
sora i centrini fati a man,
pòlvare e… e basta…

e l’ongia de la morte
la riga anca i ricordi.

…e ti te me disevi: <<canta ancora…>>

ma le ombre in pingolon sora de’l muro

le se fasea pì longhe, ora par ora…

e mi, co i oci spalancà ne’l scuro,

 

cercava un fìl de luce, par sperar…

<<canta>>, ti te disevi e el me sangiuto

el se s-gendava in tochi, drento un mar

che avea negado sogni, amori, tuto…

 

Par contentarte gò provà a cantar:

i basi e le caresse somenà

ne i viali, descondon… el me sognar

la note sora i àrgini de istà,

 

i dì de scola, l’erba de i spagnari,

i piè descalzi come i me pensieri…

l gnari a primavera su i morari,

el primo amor, i primi desideri…

 

…m’è vegnù fora un sgrisolon de pianto

insulso, senza ciucio, senza cao…

t’ò dito <<ecolo qua ‘sa l’è el me canto…

non son pì bon da un’ostia, scusa… e ciao…>>

Gò na musina ‘ndó gò sconto fiori

e lètare d’amor da mandar via,

e insieme a un s-ciantisare de colori

gh’è un arlechin che bala in alegria.

 

Do un pugno a la musina e nel me ciel

me se spampana manevei de viole

e l’arlechin, butando via el capel,

l’impina i sogni con le capriole.

 

Casca na piova grisa da i grondai

e cresse macie de umido sul muro:

vien vecio l’arlechin, el gà i ociai,

e el so vestito l’è un tabaro scuro.

 

Nel ciel me se impègola le ore

e le matine no le vien più su:

in un canton el me arlechin el more.

L’è stufo, anca lu ormai no’l bala più.