Tag Archivio per: Bassa Veronese

Descalsi drento el vdnto

molàimo tuto el còrar

al sol de na staion

che no doeda finir.

 

Mi te vegneva drio

nel fià del to profumo

e te ingasava

parole fresche

drento gitlande de aqua

 

Tèneri i giorni

e trasparenti ne l’incanto

de i oci neri fondi

che me imagava e incucoliva.

 

Desso te serco ancora

e nel me còrar, sempre descalso

ma sensa cao,

no cato più lune de agosto

e stele a San Lorenso.

 

Desso me inséngala fantasmi

ingateià in nissoi de insonia,

desso l’odore che me porto drio

el sa da fiori veci

masarà.

EI diario mio da tempo el gà zà perso

progeti, note e pagine sporcade

contro la voia de butar zò un verso.

EI diario el gà le date scancelade

 

confuse drento cieli infumentà

No cato più ricordi o frasi bele

par un amor o un sogno desfantà.

No rumo più nel calto de le stele;

 

el diario el ga le recie su i cantoni

e no gh’è pena che ghe scrive insima

al canto imbarbotà de le cansoni

e a le poesie che à impaltanà la rimza.

 

EI diario mio l’è morto ormai da un pesso

e el vento à scarmenà tuta la storia.

No scrivo più, cossì i pensieri adesso

i nasse e i more sensa più memoria.

Un sogno piassè longo de la strada

che da la cesa me menava al Bosco,

un sogno bianco come un nissolin

picà su na finestra de la corte.

 

Drento quel sogno gò cunado i ani

verdi, color del sol, de campi e d’erba.

Sant’Ana, el primo e l’unico paese

che m’à slevà impinando de bandiere

 

i desideri grandi e le speranse

che tamisava a l’ombra de la sera

tra i boti fondi de le me campane

molà ne l’aria come na preghiera.

 

Sant’Ana, in dó le case le lassava

le porte sempre verte su la strada

e dove i fossi i sverdegava a marso

zugando a ciupascondi con el sol.

 

Desso Sant’Ana à scancelà la storia,

el Bosco el vive de ricordi sbiavi

e sui quarei de corte Passarin

se gà desmentegà fin le memorie.

 

Case inciavade in coste a quei che passa

le segna el tempo de la solitudine;

serade le ostarie, nel simitero

i cava i morti in pressia, come i fusse

 

s-gende de storia che le fa paura.

Quando i me dì i se stufarà de piove,

te sercarò su l’argine de’l sol:

e ti, papà, te sarè lì a spetarme…

Me sentarò su l’orlo de un tramonto

 

con ‘na gran voia de contarte tuto,

de butar zò la rosta de i ricordi,

de ciacolar, udando insieme el grinto,

de dirte de la mama, de me fioi…

 

… ma tasarò e te strucarò la man

come da bocia, soto el to tabaro

-pàssara persa che la cata el nio-…

Pò me alzarò, su l’orlo de’l tramonto

 

a bàtar co’l serciar le ultime spighe

che el tempo à incrosetà su la memoria:

su l’ara de tren’ani de silenzio

cantando, alora, stendarò el formento…

“ I bate marso…”

e le finestre svergole

picà a càncani rùseni

se desgarbela i oci…

 

“ i bate marso…”

e su le strade smemorià

sbrissia e se desfa

gemi de luna a fiochi.

 

“ i bate marso…”

e zò da i cùgoli smorsegà

se fila un sgrisolon de primavera

a tamisar el pianto de l’Argia.

 

“… gò da sentir ancora

bàtar marso…”

el ghe disea in un sbòssego

Marieto.

 

“… i bate marso…”

nel ciasso de i bandoti

e de le cioche

la fola de la vita

la gà girado

un’altra pagina.

 

Fasendo a pian.

No gò mai corso drio a balene bianche,

no ò mai disteso vele a venti verti.

 

Da bocia el me orizonte l’era curto,

el me croava adosso in cao de l’orto.

Le storie le nassea rente a la ciesa

e le se consumava al simitero.

 

Anca l’amor me l’ò slevà con i “m’ama”

e co i “no ‘l m’ama” de le margherite

e senza aver mai visto el mar e i monti

mi conossea a memoria àrgini e fossi.

 

Cossì o viagià su un aeroplan de carta,

su un treno mai partido e mai rivado

e la me fantasia l’è stà la giostra

dove ò sognà batalie e calcinculo.

 

Eco parchè no ò robà la luna

e no ò mai corso drio a balene bianche.

Finìa la guera, ancora caldi i morti,

da i busi de le stale, soto i copi,

dal fondo de le càneve, da i orti,

saltava fora rivoltele e s-ciopi.

 

Vivéimo na paura senza storia,

ogni persona l’era forestiera…

ricordo, e ghe l’ò ancora in la memoria,

na note: l’era a fine primavera,

 

supiava un vento can su l’ara e el fosso,

la luna l’era late rabaltà.

Siè, sete, in toni e fassoleto rosso,

la s-ciopa al brasso, a gambe spalancà,

 

i somenava un respirar de morte.

La luna la pareva da scaiola.

“ Vien zó, Bertin, che semo vegnù a torte…”

La Gema a la finestra “… son  mi sola…

 

i è andà via tuti, stamatina presto…”

“ Dai, la lo ciama che ‘l lo sa anca lu…

fin desso ghen schersado, ghen tasesto,

ma da stanote no schersemo più…

 

lo copemo e… basta, co’l vien basso…”

Su la finestra in pingolon nel vento

s’à smaltà fredo un rìdar da paiasso.

La luna l’era bianca dal spavento.

M’ò colegà su un campo

stofegà de strépole

e maltratà dal vento;

gò dà la svela

a i sogni de matina

e ò scombinà i ricordi

co i rimpianti.

 

M’ò ramenà

ne l’ilusion de un canto

e gò sercà la luna

ne le poesie

filà tra stela e stela

ma non son più stà bon

de andarghe in coste

a quel che cavea perso

e go capìo

che ogni ricordo

el se rifiuta

a nàssar n’altra volta.

 

E el to sorrso

che gavea butà

de drio le spale

de l’indiferensa

el s’à infossà

sora el sentiero de busie

che te contava e che savea

le t’avaria ferìo

par sempre.

Da bocia i me ciamava ” Lampo Pucia “,

nome da can, catà sora el luame;

e, come un can bastardo e senza cucia,

gavia par compagnia miseria e fame.

 

No me restava, col passar de i ani,

che ramengar par drento le ostarie;

adesso che son vecio e che i malani

m’à rosegà servel e fantasie,

 

beo tuti i dì la me disperassion.

Beo la salute, perchè drento el vin

– come un magneto – gò catà el paron

e nei bicieri passa el me destin.

Ne l’aria più freda

se smagra

el to viso…

deventa sotile

el disegno dei labri…

 

Tra i denti un supion

de gerani…

 

Gò i oci che i ride…

 

El ponze l’odor de la pele

e le onge le riga

le spale…

 

Te struco i to fianchi

e el velo de l’erba

‘l se fa molesin…

 

Se schissa, par soto,

na viola

e se spande ne l’aria

un profumo de mus-cio…

 

Te ciamo…

te tasi…

ma i oci i te ride!