Canta con mi, compàgneme de gusto

e se me sbalio e invento le parole

fa finta che sia tuto quanto giusto

e canta piassè forte che se pole.

 

E se te stoni no gà mia importansa,

semo davanti al fogo del camin,

e stonarò anca mi par la creansa

fasendote el secondo lì vissin…

 

canta con mi che se le note in volta

le resta in pingolon, no l’è pó un drama:

ghe son mi solo  e basta che te scolta

e te le tiro  zò sul pentagrama.

 

Canta con mi, fin che stissen la fiama,

senza pensar nè al ieri nè al doman,

canta con mi, ché el fogo zà el ne ciama

a l’amicissia e a strénzarse la man.

 

Canta con mi, bevi un gossin de vin

e se la vosse no la sta più su,

fame da coro muto, pian pianin:

se canta meio se se canta in du.