I me conta,

i muri de le case, rosegà

da denti de sisara,

le fole che anca i veci

i gà desmentegà…

 

e i conta de staioni carolà,

fruà dal crussiar pigno

de le ore

scolorade par la nebia

drio de i fossi…

 

e i conta de fameie tirà su

tra la fame de le tole

sempre ude, intorno a leti

giassà de scartossi,

drento case de morti

e de panaroti…

 

e i sèghita a contar, sti muri…

e mi, sul cao

de na bina bastarda,

me resento i oci

ne la scudela de le man

e vardo, in mezo a i diei,

l’ultima luna

che la va a negarse.