Articoli

Me brusa

Me brusa ne i oci na voia de ciel,
un desiderio fresco de un to soriso
e sogno de corar su i argini e i prà
molandote el canto sul caldo de i fianchi.

Ma l’orlo del giorno, sbecà de tempeste,
l’è basso e fondandose prima del sol
no’l cata a matina i respiri de l’alba.
Cossì se incandisse le lune de agosto,

le stele cadenti, i gerani, le rose…
e resto da solo, brusà da le voie
cucià sora l’erba strinà da la suta,
col fià de l’autuno pesante su i oci.

Nel fosso del tempo se nega i to basi,
i fiori, le stele; nel mar de parole
che mi strapegava in nigosse de luna
e fonda busie piassè grandi de mi.

De cossa mai

No so de cossa mai
te t’avi inamorà…

belo no son mai stà…
e gnanca un pien de schei…

de cossa mai te gheto
inamorà

me lo domando
ancora…

forsi, e lo spero,
del me cantar ramengo
come un vilan ne i campi,

de le parole che te confondea
e le serviva a ricamar
el to silensio gonfio de ilusion…

o forsi del calor
de la me pel,
quando nel fredo
te me metei le man
par soto la camisa…

o de quel gropo
che me ingossava, quando
no sera bon
de dirte gnanca grassie…

o, forsi de quel scuro
che ne gavea incambrà
in un dì de lujo
e che lassava poco spassio
a sgrìsoli de sol…

forsi…
e no l’ò mai capìo…
e adesso no so più
a ci domandarlo.

Canta e camina

Canta e camina

a piè descarsi

e libera le ale

ne l’odor del pan

fresco a matina.

 

Canta

le storie levà su da i sogni

che spampanàvimo par strada

par regalerle a i veci

sentà sora el meal de casa.

 

Canta e rancura i to ricordi

sbandonà su i prà,

su l’orlo blu de i fossi

tra i grili e le sigale

sempre in festa.

 

Canta

e cusissi i refoli de vento

tamisà su le saraie,

su i spinicristi bati

da i giavaschi incuciatà

su le memorie.

 

E dopo averte resentado i oci

drento i tramonti,

dopo ver beù

seci de luna,

gìrate e meti le to man

drento le mie.

 

Chi sa se sarò bon

de regalarte ancora

un sgrisolon de caldo,

na s-ginsa

a fil de vita.

Quando

Quando, sveià dal sono

in do’ se gà mufìo

i to silensi,

me tornarà el ricordo

del to corpo

dorà dal lujo

che se spandea su i argini

inebetìi de sol

 

quando el fassol de luna

che avévimo disteso

tra le perteghe de i sogni

no’l servirà a sugar

lagrime e pianto

 

alora, solo alora,

el canto nostro

el se liberarà

drento el profumo garbo

de un autuno

ritrovà par caso

 

prima che casca zò

la prima neve.

Descalsi

Descalsi drento el vdnto

molàimo tuto el còrar

al sol de na staion

che no doeda finir.

 

Mi te vegneva drio

nel fià del to profumo

e te ingasava

parole fresche

drento gitlande de aqua

 

Tèneri i giorni

e trasparenti ne l’incanto

de i oci neri fondi

che me imagava e incucoliva.

 

Desso te serco ancora

e nel me còrar, sempre descalso

ma sensa cao,

no cato più lune de agosto

e stele a San Lorenso.

 

Desso me inséngala fantasmi

ingateià in nissoi de insonia,

desso l’odore che me porto drio

el sa da fiori veci

masarà.

M’ò colegà

M’ò colegà su un campo

stofegà de strépole

e maltratà dal vento;

gò dà la svela

a i sogni de matina

e ò scombinà i ricordi

co i rimpianti.

 

M’ò ramenà

ne l’ilusion de un canto

e gò sercà la luna

ne le poesie

filà tra stela e stela

ma non son più stà bon

de andarghe in coste

a quel che cavea perso

e go capìo

che ogni ricordo

el se rifiuta

a nàssar n’altra volta.

 

E el to sorrso

che gavea butà

de drio le spale

de l’indiferensa

el s’à infossà

sora el sentiero de busie

che te contava e che savea

le t’avaria ferìo

par sempre.

Gh’è un mar de sogni

Forsi
gh’è un mar de sogni
che ne speta
in cao a la strada
che avemo avù paura
de traversar insieme

forsi
gh’è sgrisoli de vento
che fin che i va
a lustrarse in coste a i pioppi
i sona cante nove

e mi
che no me rìs-cio più
a saltar el fosso
resto co i piè sora la rosta
e le to man più no le riva
a levarme su, su l’orlo
in fianco a ti.

Stéle a San Lorenso

La note la disegna

ombre giganti

sul vivo del muro;

 

son solo e la voia

de averte darente

l’è un incubo, na malatia.

 

Se rugola in fondo a la mente,

el to nome, e el scombate

violento

e el me lassa

par drento i ricordi

la coa de na stela

de agosto

cascà sora un prà.

 

E forsi no m’ò ricordà

de esprimar un desiderio.

Coréimo

Coréimo sora i sgrìsoli

de i to ani cossì bianchi

col sol inmustacià ne i oci

e i fiordalisi che sbociava

in meso a i denti.

 

Nel stofego de agosto

el to vestito in cotonina

dal bon odor de lissia

l’era più fresco

de un campo de papaveri.

 

Al cao de l’orizonte,

sensa che se incorzessimo,

vegnéva su de pressia

el primo sgrisolon de inverno.

 

Se semo rugolà

su l’erba spetenà

in serca de na stela

da ricamar sul prà de i desideri,

ma drento l’ansimar de la saraia

i basi i se smissiava

co le falive bianche

de na neve bonorina.

 

I fiori vegnù sechi

i gavèa perso

tuto el profumo.

 

Par gnente.

Fa in modo

Fa in modo de s-ciarar

ancora i me tramonti,

fa in modo che el me canto

el cata un ritornel

nel gropo de parole

che me se incioda in gola

 

me sentarò darente

a ti

scancelarò el silensio

che ne gavea indoràdo

i sogni

e che  ‘l  n’avea inibià

i progeti

 

e la poesia

che nassarà

la sarà un sfriso in ciel

na stela a San Lorenzo

par incendiar le nuvole.

 

Fa in  modo

de no far progeti

massa grandi

quando la stela

la se sbassarà a basarne,

che no suceda

come l’altra volta