La strada nostra
l’era sempre un rugolon
nel scuro.
Solo el sbarar de i ciari
l‘alsava un muro morbido
su l’oridel del fosso.
La testa su la spala
te caressavi la me pel
con un respiro de poeia.
La strada al scuro
l’era rifugio tènero
e ne le nostre ciacole
sfantàimo le paure
che rebutava a s-ciapi.
La strada in Calmaora
impolvarà e sbiancà
dal tempo sempre istesso
la savea da more
e la nasseva i sogni più impossibili
acompagnandose col canto
de la Frata.
E i basi,
come barbi impenelà de oro,
i vegnea su dal fondo de la note
e i regalava cocole a la luna.