A le prime ombre
Se spampanava le ombre
molesine del ferume
su i diari lassà verti, a sera…
el lamentarse de i careti,
drio el dumiar de i bò,
el scontornava el primo scuro
par la strada.
Curte le ore e strache
soto un ciel basso;
el campanil
el ne scorlava in coste
boti insemenìi.
“doman l’è festa…”
e la desolassion che la scavava
el gesso e el sal intorno i oci
la consumava anca el far gnente.
“… gh’è la morosa
da ‘ndar trovar…”
e i veci a l’ostaria i sugava
l’ultimo quarto
de rassegnassion.
