L’era un sogno

E la to boca

l’era un sogno

de matina

de quei che lassa el stampo

a la memoria

 

e el to soriso

l’era un desiderio

mai sorà

na voia che me rosegava

fin che spetava

el to passar, in bici,

verso sera.

 

El corpo tuo,

ofeso da i vestiti fati in casa

co i scampoli comprà

al marcà a Cologna,

l’era na stropa de salgar

tirà sul fil de l’inquietudine,

l’era el cantar

de tute le me voie.

 

E son stà el primo

a dirte

quanto te fussi bela.