Se leva sù i respiri de la bruma

e i se destira in foretoni rosa.

Un angelo in pigiama

co i diei pocià drento la sguassa

el dà la porporina a i copi

e co un restel de vento

el petena el spagnar tuto rufà.

Spanisse buti timidi a i rosari

e su  ‘l strafoio casca la somensa

de i desideri de le butelete.

 

Nel cor in boio del frumento

se inverina un grumo de papaveri.

A l’ombra de un salgaro

un paruloto l’ocia ingolosìo

na sposa

che se incornisa i oci de rondoni.

In testa de i paiari imatonìi dal sol

scorla bandoti rùseni

e el tempo el passa el tempo

a ciacolar

co i glicini e le brespe.

Rugola, improviso, su un granaro

el rìdar de la sposa

e… scapa via i rondoni.

 

El sol el tole su le ferle

e, savatando, el bagola,

sercando rechie.

Su i campi se desmissia

el rosso de le bine,

e resta su le làghene

el stampo de le sgàlmare.

Fili de fumo scrive

ricami de bombaso e capriole.

 

L’oro de la polenta

va a s-ciarar panare

e el vin el sluse drento i oci ciari

de done che le questua basi.

Le prime rughe, nate descondon,

le se confonde ne i segreti

custodidi in camara da leto.

 

Drento nissoi de vento

se intabara i piopi.  Leti pitochi,

in case resentà dal scuro,

i vive le ore longhe de la note.

Sbasisse i fogolari, a mare freda,

e, drento stale sensa bestie,

passa un filò che no gà fole.

Un par de vece

le frua corone smemorià.

Casca giaroni de silensio

e i campanili fa la guardia

a un ciel de gesso.