e l’era tempo de le rogassion…

Gustin, el campanar,

el gà catà ‘l Marieto,

inzenocià su l’erba moia,

col ciel negà ne i oci,

un fiordaliso

in mezo a i denti

e, in fondo a la scarsela,

na miola de susin.

Sul so fassol de tera

indò el gavea incalmà

filari de silenzi

par smemoriare le disgrassie,

parea che el soridesse,

par na volta.

La so desperassion,

arada con versori de busie

e pianti sconti,

la rebutava in un grombiale

d’erba spagna nova.