Sconta tra i fossi viola e tra i salgari,

un’ostaria despersa ne la val

la speta i grisoloni de la sera

nel scagnarar ragoso de le rane.

Su i muri gh’è tacà come girlande

filari de ricordi in bianco e nero

rimorsi e delusioni de pension

e sacramenti contro del governo.

Velen e vin nel sercolo de i oci

de i veci che no varda gnan più avanti,

carte che dorme arente a goti bisi

e tole che gà perso le so ciacole.

Sul campo de le boce dove le asse

le s’à ingobà tra l’erba su la sabia

gh’è cicatrici e roste e nostalgia,

gh’è un mare de sginsale intorno al lume

e gh’è ricami de scarpie a i solari.

Un vento dispetoso el scapriola

su gomissiei de lune massa vece

par incantar la voia de campar.