A rugolon

Va a rugolon la sera

drio de i piopi

e l’ultimo salgar el se stornisse

a i sgrisoloni viola.

 

Sento l’odore caldo del tabaco

che ‘l ruma ne i ricordi

e el porta a gala

el passo straco de me pare,

strapegado…

-tardi, sempre tardi-.

 

Desso el silenzio el casca

su l’orlo de la note

tra le sperangole de le careghe

ude.

 

-gh’è fumo, massa fumo…-

 

come in quel vènardi de sera

che i m’à riportà a casa

la bicicleta, e basta,

de me pare.