Su i dossi
Fora del mondo,
sora i dossi caldi
dove anca un pugno d’erba
el ne fasea da cucia,
impituràimo el ciel
de stéle massa grande.
E el scuro de la sera
el ne brincava a l’improviso
tra le parole morte in gola
e i desideri mai sorà
che smorsegava sogni
buteleti.
Sora i dossi caldi
le stéle se impissava
sempre piassè bonora
par rifiorir el pra
e regalarne sgrisoli de pèl.
E quando se molàvimo,
ti verso San Bastian
mi incontro a i soriseti
de la piassa,
el sol che ne gavea dato fastidio
qualche ora prima
se lo scondévimo gelosi
tra le pagine de l’anima.
L’aqua la sussurava
corendo a traverson
in meso a i sassi ciacoloni
e sora el pontesel de asse
malgualive
i nostri sogni i se ciamava
a far salta moleta.
