Le me man i è le man d’un boaro

taià zò co un stegagno da legna,

i è scornoci butà da un spinaro…

le me man le ricorda… le insegna…

le me conta le storie de i veci…

le profuma de tera e de giara,

de polenta, de late ne i seci,

le gà un canto malà de risara…

le me man me ricorda me opà!

i so dì stofegà ne’l lavoro

ma sbiancà da la serenità…

Mi vorìa che me fioi, quando moro,

i pensasse a’l so vecio a la vista

de do man ruzenìe de boaro,

parchè mi, senza man da pianista,

ma co i dei che par sbroij de spinaro

gò sonado ai me du buteleti

el concerto più grande del mondo,

coi me dì infrusinà, poareti,

ma vissù in onestà… fin in fondo…