E ti no te parlavi…
E ti no te parlavi
quasi mai…
e s’era mi che te scoltava
quando la sera, straco
da le giornade massa longhe,
te me tolevi su
e vardandome
te me fasei parlar…
…Mi deventava un libro verto,
na pagina zà leta
de’l giornal…
e la to vosse l’era na caressa
che se posava
come un’ala bianca
su i me quaderni con le recie,
su i compiti de scola
su i buti massa garbi
de i me giorni…
Te si ‘ndà via,
un dì de magio,
tasendo e senza disturbar…
tanti anni fà…
e pur me fioi
che no i t’à conossù,
che no i gà mai podù
scoltare i to silenzi,
che no i gà mai pocià
la pena de i to sogni
ne’l to ciel seren,
quando l’è sera, i sente
la vosse de so nono
che la va par casa…
… e ti no te parlavi
quasi mai…
