I sogni dei pitochi

I sogni de i pitochi

i è magri e tristi e lenti

come un obito d’inverno

e la memoria l’è smarìa, sbiancà

in un pugno de ricordi

desmentegà par strada.

 

Le vele del silensio

le sbrissia sul tramonto

a l’orizonte

e le onde che le leva

i è cicatrici verte…

 

I sogni i more tuti i giorni

e a volte no i è boni

gnan de rinàssar e i cata casa

in sima a barche

de carton

ferme su l’orlo

de cieli sensa luna.

 

I sogni de i pitochi

i coa na malatia

che no la vol guarir

e la ràntega che lima

le ore messe in fila

la perde el ritmo, ogni minuto,

e la va a ingateiarse

nei vissinei più scuri

de paura.