Coréimo

Coréimo sora i sgrìsoli

de i to ani cossì bianchi

col sol inmustacià ne i oci

e i fiordalisi che sbociava

in meso a i denti.

 

Nel stofego de agosto

el to vestito in cotonina

dal bon odor de lissia

l’era più fresco

de un campo de papaveri.

 

Al cao de l’orizonte,

sensa che se incorzessimo,

vegnéva su de pressia

el primo sgrisolon de inverno.

 

Se semo rugolà

su l’erba spetenà

in serca de na stela

da ricamar sul prà de i desideri,

ma drento l’ansimar de la saraia

i basi i se smissiava

co le falive bianche

de na neve bonorina.

 

I fiori vegnù sechi

i gavèa perso

tuto el profumo.

 

Par gnente.