No lo savèimo gnanca

erimo siori e gnanca lo savèimo…

andaìmo a spigolar par campi e bine,

magnàimo el codeghin, fredo, la sera

par far più parte…

ma a i cantarini de la stela

ghe regalavimo el salado…

 

gavèa na giachetina roversà

e el tabar vecio de me poro opà

magnava la polenta drento el late

co’l cuciaro sbuso…

ma mi robava le fassine in stala

par darghe un fià de caldo a i più pitochi…

 

spacava el giasso ne’l cadin, l’inverno,

par lavarme…

e par scaldarme i piè, me mama,

la me metea le bronze ne le s-giavare…

e pur, me nono, a sera,

‘l spartèa el vin crinto con la corte…

 

èrimo siori e gnanca lo savèimo…

 

Adesso che in scarsela

me bala na palanca in più

me vardo intorno

e sento d’èssar solo…

adesso son pitoco

e me ne incorzo…