Pipo
Par mesi e mesi, come na cambiale
fruà da la paura e da la guera,
Pipo el rivava, in cielo, puntuale
co i primi sgrisoloni de la sera…
Pipo… e la gente la gavea paura…
la se scondea in rifugio o in sotoscala…
drento la casa senza luce, scura,
opure co le bestie ne la stala
tiraimo el fià, fin che un silenzio grando
no ‘l ne disea ch’era finìo el spavento…
vegnèimo fora da’l rifugio e quando
sentèimo sora i oci gonfi el vento
e el fresco e la caressa de la sera,
la gente la sfogava el so tormento
che la s’avea tegnùdo soto tera
co un paro de bastieme e un sacramento…
me nono invesse, calmo e soridente,
el me diseva: “varda che seren…
vardete intorno… no è sucesso gnente…
disemo grassie a Dio che’l ne vol ben…”
