Coriandoli de luna
i me pensieri
che i se burata
in confusion de grinto
e borotalco;
Vissinei de sol
desgateià par aria
e lampi de balon
su sabionari e giara
le idee che le se sfanta
su’l computer, desso.
E le parole ormai stranide
i è buti che fa el bao
ne’l prà de i desideri
andadi in cuco.
In un filò desmemorià,
el tempo el passa el tempo
a bevarar la sabia
su na stradela de cipressi
che se fa longa
e sempre piassè scura.
Ci sa se me i ricordo tuti quanti
quei bocia che zugava insieme a mi
e che n’ò visto più… forsi qualcun
l’à sbregà tuti i foj del calendario
e la molado l’aquilon nel vento…
Giusto, l’è ‘l primo che me vien in mente,
longo e smagrà da giorni massa curti
par la so pressia de zugar in strada…
e Caio, che ‘l zugava co le zurle
e el se sognava sempre de volar…
l’è volà via, na note, de scondon,
cascando da un pontezo carolà…
e l’à incrosado le ale con Benito
che, al Brenero, l’avea, sbaliando strada,
ciapà un sentiero somenà de viole.
Ci sa se adesso i se la conta insieme,
se i suga a s-cianco, a pice, con Saviato
che l’era stado el primo de noialtri
a respirare l’aria de le stele
fiorìa ‘n un fosso da na bomba a man!
Romano, Eros Sacheto, Gero Ridi…
nomi da buteleti su na giostra
fodrà de luci morte e de silensi…
nomi che i par farfale sensa testa
molà drento la gabia de i ricordi…
Sora na foto giala, scoloria,
mi son ‘ndà in serca de le vostre face
e le ò catà precise, risparmià
dal tempo che à imbiancàdo i me ricordi,
e ò visto, drio al sipario de veludo
che se verzea pianin ne la memoria,
el sol robà su i campi de brespagna,
el sol che ne s-ciocava drento i oci
quela matina che s’à desligà
cantando le campane de Sant’Ana
e tuti insieme semo andà a zugar
co i elmi larghi e co i scarponi mori
de un batalion che avea portà la pace.
Son nato che, sui copi,
le rondene ciassava…
e el ciaciarar de mile osei
l’à acompagnà i me zughi
de butin…
El ciel del me paese,
incolorà de un blu
che, adesso, ormai, cato nei sogni
e basta,
ogni morir d’istà
el rancurava nel so sial
de seda
gnari e penoti
somenà tra i conventini.
Ma, un ano che l’istà
desmentegandose del tempo
l’era restà a sponsar
su i sabionari de la Bassa,
na rondena
l’avea molado el s-ciapo
e la s’avea fermà
tacà ai me copi.
… e l’à zugà a cusati
insieme al sol
che se malava
e intanto ‘l se intanava
drento le nebie… a pian…
.
Gh’era na luna freda che s-ciarava
le strade de paura, al Borgofuro…
s’era scapà de casa e sbrindolava
a l’orba, come un ligaoro al scuro…
Da un s-ciapo de robini na canson
la m’à ciamado, timida, pian pian…
m’ò catà coi tedeschi, in un tendon,
e un gavetin de late ne le man…
Su la lucerna e su le teste bionde,
sora le bale de la paia e el fen,
se rugolava come pice tonde
le note calde de Lilì Marlèn.
Parea che el ciel, fin alora nudo,
el se vestisse de gerani e viole,
e che na siarpa, bianca, de veludo
la ne struzesse via tute le fole…
Era bastado un coro e na canson
par farne star insieme, quela sera,
e farne mètar ne’l desmentegon
ch’erimo fioi, caìni, de la guera…
Me opà el m’à catà tardi… (el me sercava!)
indormensà co’n gavetin sul sen,
e, a lu, che, muto, i oci el se sugava,
i gà cantado, a pian, Lilì Marlèn…
S’era bociassa,
scuro da’l sol come na tupinara,
sèngalo e magro come un ligaòr…
na sfiondra in pingolon
da le scarsele…
sior de du oci mori
e de na voia de vivare ne’l vento…
tra i denti ciari me nassea na canta,
na fis-ciada alegra
come de rossignol imatonio de azuro.
Ma un giorno, drio de’l simitero,
soto na piova che parea de piombo,
na bomba m’è scopiada drento al cor!
Go visto un mucio griso
de omeni butà su un fassinaro…
e sento e mile boche arsìe,
piene de tera, le sbasiva negre.
Un vento fredo
de paura stupidida
l’avea scoacià le case.
Un fogo de mitralia,
pò l’urlo d’un paese…
el ciel deventà sal
cascava in fregole.
Me s’à ingrumado el sangue
drento le vene dure
de scaiola freda…
e son deventà vecio…
orfano e vedovo…
na bomba m’è scopiada
drento el cor…
la m’à incandìdo i sogni
de butin
e i è restadi muchi,
stofegadi…
come i me oci neri,
come el dolor ragoso
de quele quatro case
de la Bassa
che le gaveva conossudo
i oci mei de pàssara
imbriagadi par sercar el sol.